Wednesday, December 17, 2014

7-معادلة ونظرية

 
= حمد الله على السلامة ...
-       الله يسلمك ...
= يا ترى إيه أخبار النهارده
-       لا جديد .. يوم عمل عادى .. بس الجديد رناتك
= صوتها مملوء بالفرحة وأيه الجديد اللى ضفته ليومك ..
-       مش عارف .. يمكن معادلة فرح ناقصة ...
= تانى معادلات ...
-       انت ما سمعتيش عن  " الحياة الإنسانية فى معادلات هندسية" ...
= واضح أن الهندسة .. رسمت فى عقلك دوائر ومثلثات ... وغلفتها بطبقة معادلات ... أيه الكتاب ده كمان ..
-   لا دى مجرد نكته عملنها على واحد صاحبنا ... هو مهندس ووالده مهندس .. فعملين كتاب سمناه "الحياة الإنسانية فى معادلات هندسية " للمهندس إبن المهندس أخو المهندس ..
= يا سلام على الهندسة ...
-       يعنى تقدرى تقولى أن الهندسة رسمت لحياتى خطوط اغلبها خطوط مستقيمة ...
= ضاحكة يعنى حضرتك إنسان مستقيم .. ولا شعاع ...
-       دايما بفضل نظرية بسيطة .. اقصر بعد بين نقطتين هو الخط المستقيم الواصل بينهم ..
= بعد المعادلات فى نظريات كمان ... اسمحلى الهندسة لحست دماغك...
-       أنا لسه كمان لم أقل لك على أقصر بعد بين نقطة وخط مستقيم هو البعد العمودى ...
= ولا تقولى ولا أقولك .. أنا قلت لك من قبل .. حكرهك زى كرهى لكل الحسابات والأرقام ..
-       طيب ولو قلت لك على 1+1 = 1
= ممكن أصدقك لسببين  : أولا جهلى بالرياضة .. ثانيا : لأنى تأكدت تماما من جنانك الرسمى .. ودى حالة جنان معروفة أسمها "الجنون الرياضى"..  
-   تعرفى أن كان فى أغنية لفريق أجنبى بتقول كده ..... حاجة كدة فى نهاية السبعينات وبداية الثمانينات ... كانوا بنتين .. واحدة سمرة .. السمار بتاع أمريكا اللاتينية والتانية شقرة ..حاجة كدة بس موش فاكر اسم الفريق ...
= يمكن تقصد فريق " البكاراه" ..
-       ايوه تقريبا ..
= بس أنا ما سمعتش عن الأغنية دى من قبل كده ...
-       دى كانت أغنية بالألمانى .. وبيغنوها مع أطفال ...
-       أيوه أيوه .. أنا عارفة الأغنية دى .. لكنى لم أكن عارفة معانيها ...
-   أبدا بسيطة جدا ... المغنية بتقول للأطفال 1+1 = 1 الأطفال يردوا  يقولوا غلط .. فبتشرح النظرية لما بتكون معايا وبكون معاك .. واحد + واحد = واحد.
ويبقى دوما الكل فى واحد !

1 comment:

Anonymous said...

🥰🥰🥰